ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ត្រូវបានគេស្គាល់ថាជាឥស្សរជនមួយរូប មានកិត្តិស័ព្ទល្បីល្បាញនៅកម្ពុជា និងកំពុងកាន់កាប់តំណែងជាន់ខ្ពស់ក្នុងជួររដ្ឋាភិបាលនៃព្រះរាជាណាចក្រកម្ពុជា តួយ៉ាងលោកជាប្រធានឧត្តមក្រុមប្រឹក្សាសេដ្ឋកិច្ចជាតិ (SNEC) ជាឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលក្រោមការដឹកនាំរបស់លោក បានជំរុញឲ្យសេដ្ឋកិច្ចកម្ពុជាមានការរីកចម្រើន ក្នុងអត្រាផលិតផលក្នុងស្រុកសរុប (GDP) ជាមធ្យមប្រមាណ៧% ក្នុងមួយឆ្នាំ ក៏ដូចជាភាពប៉ិនប្រសប់លើការគ្រប់គ្រងហិរញ្ញវត្ថុរបស់ប្រទេសកម្ពុជាទាំងមូល។
បើតាមក្រសួងសេដ្ឋកិច្ច និងហិរញ្ញវត្ថុ បានឲ្យដឹងខ្លីៗពីជីវប្រវត្តិរបស់ឯកឧត្តមអគ្គបណ្ឌិតសភាចារ្យ យ៉ាងដូច្នេះថា លោកកើតនៅថ្ងៃទី១ ខែតុលា ឆ្នាំ១៩៦៥ ក្នុងទីក្រុងភ្នំពេញ ដោយមានភរិយាគឺ លោកជំទាវ អ៊ឹម ប៉ូលីកា ជាកូនស្រីរបស់អតីតរដ្ឋមន្ត្រីក្រសួងអប់រំ លោក អ៊ឹម សុធី និងមានកូនចំនួន ៤នាក់ជាចំណងដៃ (ស្រីពីរនាក់)។
លោកមានចំណេះដឹងជ្រៅជ្រះ ដោយអាចនិយាយបាន ២ភាសាក្រៅពីភាសាជាតិ ដូចជាអង់គ្លេស និងរុស្ស៊ី។ ចាប់តាំងពីឆ្នាំ១៩៨៤ ដល់ឆ្នាំ១៩៩៣ លោកបានសិក្សានៅប្រទេសរុស្ស៊ីតែមួយគត់ ពោលលោកទទួលបាន សញ្ញាប័ត្រពាណិជ្ជកម្មអន្តរជាតិពីបណ្ឌិតសភាសេដ្ឋកិច្ចរុស្ស៊ី ក៏ដូចជាទទួលបាន អនុបណ្ឌិតផ្នែកសិល្បៈ និងបណ្ឌិតទស្សនៈវិទ្យា ពីសាកលវិទ្យាល័យរដ្ឋមូស្គូ ហើយក្រោយមកឆ្នាំ២០១៨ នៅកម្ពុជា លោកទទួលបានការសិក្សានៅរាជបណ្ឌិតសភាកម្ពុជាបន្ថែមទៀត។
ងាកមកមើលអំពីប្រវត្តិការងាររបស់លោកវិញ អំឡុងឆ្នាំ១៩៩៣-១៩៩៤ លោកគឺជាជំនួយការសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា នៅឆ្នាំ១៩៩៤-១៩៩៦ ជាទីប្រឹក្សាទេសរដ្ឋមន្ត្រី ទទួលបន្ទុកស្តារ និងអភិវឌ្ឍន៍ និងក៏ជាជំនួយការរដ្ឋមន្ត្រីមន្ត្រីក្រសួងសេដ្ឋកិច្ច និងហិរញ្ញវត្ថុ នៅឆ្នាំ១៩៩៦-១៩៩៩ ជានាយកខុទ្ទកាល័យក្រុមប្រឹក្សាអភិវឌ្ឍន៍កម្ពុជា និងនៅអំឡុងឆ្នាំនោះដដែល ជាអ្នករៀបចំគោលនយោបាយ និងជាមន្ត្រីសេដ្ឋកិច្ចជាន់ខ្ពស់របស់ក្រសួងសេដ្ឋកិច្ច និងហិរញ្ញវត្ថុ នៅឆ្នាំ១៩៩៩-២០០៣ ជាអគ្គលេខាធិការក្រសួងសេដ្ឋកិច្ច និងហិរញ្ញវត្ថុ មានឋានៈស្មើររដ្ឋលេខាធិការ នៅឆ្នាំ១៩៩៩-២០១៣ ជាសមាជិកក្រុមប្រឹក្សាភិបាលធនាគារជាតិនៃកម្ពុជា នៅឆ្នាំ១៩៩៨-២០១៣ ជាទីប្រឹក្សាសេដ្ឋកិច្ចរបស់នាយករដ្ឋមន្ត្រី នៅឆ្នាំ២០០៣-២០១៣ ជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នៅឆ្នាំ២០១៦-២០១៨ ជាទេសរដ្ឋមន្ត្រីនៃកម្ពុជា ហើយនៅឆ្នាំ២០០២ មកទល់បច្ចុប្បន្នលោកជាប្រធានឧត្តមក្រុមប្រឹក្សាសេដ្ឋកិច្ចជាតិ (SNEC) នៅឆ្នាំ២០១៣ មកទល់បច្ចុប្បន្ន ជារដ្ខមន្ត្រីក្រសួងសេដ្ឋកិច្ច និងហិរញ្ញវត្ថុ និងនៅឆ្នាំ២០១៨ រហូតមកដល់បច្ចុប្បន្ន ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន មានឋានៈជាឧបនាយករដ្ឋមន្ត្រី នៃព្រះរាជាណាចក្រកម្ពុជា៕
