មន្ត្រីជាន់ខ្ពស់ក្រសួងសេដ្ឋកិច្ច រំពឹងថាសេដ្ឋកិច្ចកម្ពុជានឹងសម្រេចអត្រាកំណើន៦.៣% នៅឆ្នាំនេះ

ឆ្នាំមុនសេដ្ឋកិច្ចរបស់ប្រទេសកម្ពុជាមានកំណើន៦% ខណៈឆ្នាំ២០២៥នេះ កម្ពុជានឹងមានអត្រាកំណើនសេដ្ឋកិច្ចរបស់ខ្លួនបន្ថែមទៀតរហូតដល់៦.៣% ។ នេះបើតាមការលើកឡើងរបស់ឯកឧត្តមបណិ្ឌតសភាចារ្យ ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកម្ពុជា ដោយថ្លែងនៅក្នុងពិធីចុះបញ្ជីលក់សញ្ញាបណ្ណសាជីវកម្មជាផ្លូវការរបស់ធនាគារ អេស៊ីលីដា ភីអិលស៊ី កាលពីថ្ងៃទី២៤ ខែកុម្ភៈ ឆ្នាំ២០២៥ ដែលរៀបចំដោយ ផ្សារមូលបត្រកម្ពុជា (ផ.ម.ក) ។

ឯកឧត្តមបណិ្ឌតសភាចារ្យ ហ៊ាន សាហ៊ីប បានលើកឡើងថា ជាលទ្ធផល តាមការព្យាករ សេដ្ឋកិច្ចកម្ពុជាសម្រេចបានកំណើន៦% ក្នុងឆ្នាំ២០២៤ និងបន្តកំណើនថែមទៀតដល់៦.៣% សម្រាប់ឆ្នាំ២០២៥ ហើយការវិនិយោគឯកជននៅកម្ពុជា បានបង្ហាញសញ្ញាវិជ្ជមានល្អប្រសើរ ឆ្លុះបញ្ចាំងតាមរយៈការអនុម័តគម្រោងវិនិយោគថ្មីៗ ដោយក្រុមប្រឹក្សាអភិវឌ្ឍន៍កម្ពុជាចំនួន ៤១៤គម្រោងនៅឆ្នាំ២០២៤ កើនឡើង ១៤៦គម្រោងធៀបនឹងឆ្នាំ២០២៣ ។

សូមជម្រាបថា រដ្ឋាភិបាលបានអនុម័តសេចក្តីព្រាងថវិកាជាង ៩.៣ពាន់លានដុល្លារនៅឆ្នាំ២០២៥ តាមរយៈក្តីសង្ឃឹមពីវិស័យជាច្រើនតួយ៉ាង ការរួមចំណែកពីវិស័យឧស្សាហកម្មមានចំនួន៨.៦% សេវាកម្ម៥.៦% និងកសិកម្ម១.១% ព្រមទាំងវិស័យផ្សេងៗទៀត។ ដោយឡែកសម្រាប់ផលិតផលក្នុងស្រុកសរុប (GDP) របស់ប្រទេសកម្ពុជា ត្រូវបានរំពឹងថានឹងឈានដល់ប្រមាណ ៥១.៣៩ពាន់លានដុល្លារ ហើយ GDP សម្រាប់មនុស្សម្នាក់ៗគឺ ២ ៤២៩ដុល្លារ៕