ភ្នំពេញ ៖ ធនាគារ ABA ជាធនាគារដែលកំពុងមានប្រជាប្រិយភាពមួយនៅក្នុងប្រទេសកម្ពុជា និងមានអតិថិជនកំពុងប្រើប្រាស់ច្រើនជាងគេមួយផងដែរ ។ ក្នុងឆ្នាំ២០២៣កន្លងទៅនេះ គិតត្រឹមថ្ងៃទី៣១ ខែតុលាឆ្នាំ ២០២៣ ធនាគារ ABA រកប្រាក់ចំណូល ៣៤៣លានដុល្លារអាមេរិក និងប្រាក់ចំណេញសុទ្ធ២៥៥លានដុល្លារអាមេរិក ។ នេះបើតាមសេចក្ដីប្រកាសព័ត៌មានរបស់ធនាគារជាតិកាណាដាដែលជាក្រុមហ៊ុនមេរបស់ធនាគារABA ។
ធនាគារជាតិកាណាដាបានវិនិយោគដំបូងនៅក្នុងប្រទេសកម្ពុជា ក្នុងឆ្នាំ ២០១៤តាមរយៈទិញយកភាគហ៊ុន១០ភាគរយជាផ្នែកមួយនៃផែនការរបស់ខ្លួនក្នុងការពង្រីកទីផ្សារអន្តរជាតិ ។ ក្រោយមកធនាគារមួយនេះ បានបង្កើនភាគហ៊ុនរបស់ខ្លួនដល់៤២ភាគរយ ក្នុងឆ្នាំ ២០១៥ និងដល់៩០ភារយក្នុងឆ្នាំ២០១៦ ។ នៅក្នុងឆ្នាំ ២០១៩ ធនាគារនេះបានបង្កើនការកាន់កាប់ភាគហ៊ុនរបស់ធនាគារ ABA ១០០ភារយ ជាមួយនឹងវិនិយោគបន្ថែមចំនួន ៦៣លានដុល្លារអាមេរិក ។ គិតមកដល់ពេលនេះ ធនាគារជាតិកាណាដាបានបណ្ដាក់ទុនវិនិយោគ នៅក្នុងធនាគារABA សរុបចំនួន ៣២០លានដុល្លារអាមេរិក ។
កាលពីថ្ងៃទី១២ មីនា ២០២៤កន្លងទៅនេះ ភ្នាក់ងារសារព័ត៌មាន Bloomberg បានចេញផ្សាយថា ធនាគារជាតិកាណាដាកំពុងស្វែងរកជម្រើសនានា សម្រាប់ធនាគារក្រោមចំណុះរបស់ខ្លួនគឺសំដៅលើធនាគារ ABA ដោយជម្រើសទាំងនោះអាចជាការលក់ភាគហ៊ុនភាគតិច ឬភាគហ៊ុនភាគច្រើនឬក៏អាចលក់ភាគហ៊ុនទាំងស្រុកកិច្ចក្នុងព្រមព្រៀងមួយដែលអាចមានតម្លៃរហូតដល់ជាង២ពាន់លានដុល្លារអាមេរិក ។ តែធនាគារជាតិកាណាដាក៏បានចេញប្រកាសច្រានចោលជុំវិញការចុះផ្សាយព័ត៌មានមួយនេះ ដោយថាធនាគាររបស់ខ្លួនមិនមានបំណងក្នុងការលក់ភាគហ៊ុនរបស់ ABA នៅនោះទេ ៕
