ភ្នំពេញ ៖ នៅក្នុងរដូវក្ដៅនេះ កំណើននៃការប្រើប្រាស់ថាមពល ត្រូវបានរកឃើញមានការកើនឡើងប្រមាណ៣០ភាគរយ ដែលធ្វើឱ្យអគ្គិសនីកម្ពុជា ត្រូវរកប្រភពថាមពលផ្សេងៗដើម្បីមកបំពេញតម្រូវការឱ្យគ្រប់គ្រាន់។នេះបើតាមសេចក្ដីជូនដំនឹងរបស់អគ្គិសនីកម្ពុជានៅល្ងាចថ្ងៃទី ០៧ មេសា ២០២៤ ។
យោងតាមសេចក្ដីជូនដំណឹងរបស់អគ្គិសនីកម្ពុជា ( EDC ) បានឱ្យដឹងថា ចាប់ពីដើមខែមេសា ឆ្នាំ ២០២៤នេះ សីតុណ្ហភាពនៅក្នុងប្រទេសកកម្ពុជាកើនកម្ដៅជាខ្លាំង បណ្ដាលឱ្យការប្រើប្រាស់ចេញពីប្រព័ន្ធផ្គត់ផ្គង់របស់អគ្គិសនីកម្ពុជាកើនឡើងប្រមាណជា៣០ភាគរយ បើប្រៀបធៀបជាមួយឆ្នាំមុន ។ ដើម្បីដោះស្រាយបំពេញបង្គ្រាប់តម្រូវការប្រើប្រាស់ថាមពលអគ្គិសនីដែលកើនឡើងយ៉ាងគំហុកនេះ អគ្គិសនីកម្ពុជាចាំបាច់ត្រូវផលិតអគ្គិសនីចេញពីរោងចក្រប្រើប្រេងឥន្ធនៈ ដែលចំណាយថ្លៃដើមខ្ពស់ខ្លាំង ។ ដូច្នេះ ដើម្បីចូលរួមសន្សំសំចៃកាត់បន្ថយការចំណាយលើការប្រើប្រាស់ថាមពលអគ្គិសនី ដែលមានថ្លៃខ្ពស់ក្នុងរយៈពេលខ្លីនេះ ទុកថវិកាសម្រាប់បម្រើអ្វីដែលមានប្រយោជន៍វិញ អគ្គិសនីកម្ពុជាអំពាវនាវឱ្យអ្នកប្រើប្រាស់ចូលរួមសន្សំសំចៃទាំងអស់គ្នា ។
អគ្គិសនីកម្ពុជាបញ្ជាក់ថា ការជួយសន្សំសំចៃថាមពលអគ្គិសនីរបស់បងប្អូន មិនត្រឹមតែបានកាត់បន្ថយការចំណាយក្នុងការទូទាត់ថ្លៃប្រើប្រាស់អគ្គិសនីរបស់ខ្លួនផ្ទាល់ប៉ុណ្ណោះទេ គឺបានចូលរួមចំណែកកាត់បន្ថយការចំណាយរបស់អគ្គិសនីកម្ពុជាក្នុងការផលិតថាមពលដែលមានថ្លៃដើមខ្ពស់ ជាពិសេសជៀសវាងបញ្ហាខ្វះខាតប្រភពផ្គត់ផ្គង់ក្នុងករណីម៉ាស៊ីនផលិតអគ្គិសនីខ្នាតធំណាមួយខូច ដែលអាចកើតមានឡើងជាយថាហេតុ ក្នុងស្ថានភាពអាកាសធាតុក្ដៅហួតហែងបែបនេះ ៕
