តាមការឲ្យដឹងលើទំព័រហ្វែសប៊ុកផ្លូវការរបស់ ក្រុមហ៊ុន មេនូឡាយហ្វ៍ ខេមបូឌា នៅថ្ងៃទី៣ ខែកុម្ភៈ ឆ្នាំ២០២៥នេះថា សភាពាណិជ្ជកម្មអាមេរិកនៅកម្ពុជា បានទទួលស្គាល់ ក្រុមហ៊ុន មេនូឡាយហ្វ៍ ខេមបូឌា ជាស្ថាប័នឆ្នើមក្នុងសកម្មភាពគាំទ្រសហគមន៍ផ្នែកសុខភាព និងបរិស្ថានតាមរយៈពានរង្វាន់ចំនួន២ គឺ “Social Impact (Health) Award Winner និង Social Impact (Environment) Award Runner-Up” ក្នុងកម្មវិធីប្រគល់ពានរង្វាន់ទំនួលខុសត្រូវសង្គមឆ្នើមលើកទី៦ (AMCHAM CAMBODIA 6th CSR EXCELLENCE AWARDS)។
ពានរង្វាន់ទាំង២ នេះត្រូវបានទទួលស្គាល់តាមរយៈព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងលើកទី២៩ ដែលទើបតែបញ្ចប់ទៅកាលពីខែធ្នូថ្មីៗនេះក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងអត្តពលិកជាង ១៤ ៣៧០នាក់ និងគម្រោងឧទ្យានសហគមន៍ អង្គរ-មេនូឡាយហ៍្វ ដែលបានចូលរួមចំណែកយ៉ាងសំខាន់ក្នុងកិច្ចការលើកកម្ពស់សុខុមាលភាពប្រជាជន ជំរុញកំណើនសេដ្ឋកិច្ចរួម និងអនាគតប្រកបដោយចីរភាព។
ក្រុមហ៊ុន មេនូឡាយហ្វ៍ ខេមបូឌា ស្ថិតក្រោមក្រុមហ៊ុន មេនូឡាយហ្វ៍ ហ្វាយនែនសល ដែលជាក្រុមហ៊ុនផ្តល់សេវាកម្មហិរញ្ញវត្ថុឈានមុខគេមួយលំដាប់ថ្នាក់អន្តរជាតិដែលផ្តល់ការប្រឹក្សាហិរញ្ញវត្ថុ ដំណោះស្រាយធានារ៉ាប់រង ព្រមទាំងផលិតផល និងសេវាកម្មគ្រប់គ្រងទ្រព្យសម្បត្តិជូនដល់អតិថិជនជាលក្ខណៈបុគ្គល ជាក្រុម និងជាស្ថាប័ន។
គិតត្រឹមចុងឆ្នាំ ២០២១ ក្រុមហ៊ុន មេនូឡាយហ្វ៍ ហ្វាយនែនសល មានបុគ្គលិកបម្រើការងាជាង ៣៨ ០០០ នាក់ ទីប្រឹក្សាធានារ៉ាប់រងជាង ១១៩ ០០០ នាក់ និងដៃគូចែកចាយផលិតផលធានារ៉ាប់រងអាយុជីវិតរាប់ពាន់ដៃគូផ្សេងទៀត ដែលកំពុងបម្រើសេវាកម្មជូនអតិថិជនជាង ៣៣លាននាក់។ ដោយឡែក គិតត្រឹមថ្ងៃទី ៣០ ខែ កញ្ញា ឆ្នាំ ២០២១ ក្រុមហ៊ុន មេនូឡាយហ្វ៍ ហ្វាយនែនសល មានសាច់ប្រាក់ប្រតិបត្តិការចំនួន ១,១ ទ្រីលានដុល្លារអាមេរិកដែលជាទ្រព្យសកម្ម៕
