ថ្នាក់ដឹកនាំសមាគមមីក្រូហិរញ្ញវត្ថុ និងសមាគមធនាគារនៅកម្ពុជា អញ្ជើញជាវាគ្មិនក្នុងវេទិកាស្តីពី “ការចូលរួមផ្សព្វផ្សាយចំណេះដឹងហិរញ្ញវត្ថុ និងការប្រើប្រាស់ឥណទានប្រកបដោយទំនួលខុសត្រូវ”

កាលពីព្រឹកថ្ងៃទី២៦ ខែមីនា ឆ្នាំ២០២៥ លោក រ័តន្ន សោភ័ណ ប្រធានសមាគមធនាគារនៅកម្ពុជា និងលោកជំទាវ ឌិត នីតា ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានអញ្ជើញចូលរួមជាវាគ្មិនក្នុងកិច្ចពិភាក្សារវាងអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុ ស្តីអំពី «តួនាទីរបស់ប្រព័ន្ធផ្សព្វផ្សាយនៅក្នុងការបញ្ជ្រាបចំណេះដឹងហិរញ្ញវត្ថុ និងការប្រើប្រាស់កម្ចីប្រកបដោយទំនួលខុសត្រូវ» ដែលរៀបចំឡើងដោយក្រុមហ៊ុនក្រេឌីត ប្យូរ៉ូ ខេមបូឌា និងក្លឹបអ្នកកាសែតកម្ពុជា។

គោលបំណងនៃការរៀបចំវេទិកាពិភាក្សាសារព័ត៌មានខាងលើ គឺដើម្បីផ្តល់ឱកាសដល់អ្នកសារព័ត៌មាន ជាពិសេសអ្នកសារព័ត៌មានផ្នែកសេដ្ឋកិច្ចបានស្វែងយល់អំពីតួនាទីនៃប្រព័ន្ធចែករំលែកព័ត៌មានឥណទាននៅកម្ពុជាក្នុងការលើកកម្ពស់ស្ថិរភាពវិស័យហិរញ្ញវត្ថុនៅក្នុងទីផ្សារឥណទាន, និន្នាការនៃទីផ្សារឥណទាន និងឥរិយាបថអ្នកប្រើប្រាស់ រួមទាំងស្ថានភាពឥណទាននៅកម្ពុជាសម្រាប់ឆ្នាំ២០២៤។

តាមរយៈកិច្ចពិភាក្សានេះ អ្នកសារព័ត៌មានបានជ្រាបកាន់តែច្បាស់ពីប្រព័ន្ធចែករំលែកព័ត៌មានឥណទាននៅកម្ពុជា និន្នាការនៃទីផ្សារឥណទាន និងកិច្ចសហការរវាងវិស័យសារព័ត៌មាន និងវិស័យហិរញ្ញវត្ថុក្នុងការផ្សាភ្ជាប់គម្លាតរវាងវិស័យទាំងពីរ ដើម្បីជម្រុញបរិយាបន្នហិរញ្ញវត្ថុ និងលើកកម្ពស់ការប្រើប្រាស់ឥណទានប្រកបដោយទំនួលខុសត្រូវ៕