ភ្នំពេញ ៖យោងតាមរបាយការណ៍ហិរញ្ញវត្ថុរបស់ធនគារអេស៊ីលីដា ភិអិលស៊ីបានបង្ហាញថា ក្នុងឆ្នាំ២០២៣កន្លងទៅនេះ ធនាគារអេស៊ីលីដាភីអិលស៊ី ទទួលបានប្រាក់ចំណេញសុទ្ធចំនួន ១៣៨លានដុល្លារអាមេរិក ដែលមានការធ្លាក់ចុះប្រមាណ២០ភាគរយ បើធៀបនឹងឆ្នាំ ២០២២ ប៉ុន្តែបើក្រលេកមកមើលតួលេខនៃប្រាក់ចំណេញសុទ្ធឃើញថានៅតែមានភាពល្អប្រសើរ ។
ក្នុងឆ្នាំ ២០២២ ធនាគារអេស៊ីលីដាទទួលបានប្រាក់ចំណេញសុទ្ធក្រោយបង់ពន្ធចំនួន១៧០លានដុល្លារអាមេរិក ។ ការធ្លាក់ចុះនៃប្រាក់ចំណេញសុទ្ធរបស់ធនាគារមួយ ដោយសារតែកត្តាបញ្ហាសេដ្ឋកិច្ច ដែលបណ្ដាលមកពីវិបត្តិជំងឹកូវីដ១៩ និងសង្គ្រាមរវាងរុស្ស៊ី និងអ៊ុយក្រែន ។ ក្នុងនោះដែរឥណទានមិនដំណើរការ របស់ធនាគារមួយនេះ បានកើនឡើងពី២,៩ភាគរយក្នុងឆ្នាំ ២០២២ ដល់ ៦,៣៩ភាគរយក្នុងឆ្នាំ ២០២៣ ។
ទោះបីជាយ៉ាងណាក្ដី ធនាគារអេស៊ីលីដានៅតែទទួលបានកំណើនប្រាក់បញ្ញើល្អប្រសើរ ដោយក្នុងឆ្នាំ ២០២៣កន្លងទៅ មានកំណើនរហូតដល់១៣,១ភាគរយ ពោលកគឺដល់៧,២ពាន់លានដុល្លារអាមេរិក ដែលធ្វើឱ្យសកម្មរបស់ធនាគារបានកើនឡើងដល់៩,៨ពាន់លានដុល្លារអាមេរិក ។
