ភ្នំពេញ ៖ យោងតាមសេចក្ដីប្រកាសព័ត៌មានរបស់ធនាគារពិភពលោក ចេញផ្សាយថ្ងៃទី១៥ មីនា ២០២៤កន្លងទៅនេះ បានឱ្យដឹងថា ផ្លូវជនបទជាច្រើនខ្សែនៅក្នុងខេត្តចំនួនបី ក្នុងប្រទេសកម្ពុជា ត្រូវបានរពឹងថានឹងមានភាពរឹងមាំកាន់តែប្រសើរ ដើម្បិទប់ទល់នឹងឥទ្ធិពលនៃអាកាសធាតុនិងសម្រាប់ពលរដ្ឋប្រើប្រាស់នៅគ្រប់កាលៈទេសៈនៃអាកាសធាតុ ដើម្បីទទួលបានសេវាថែទាំសុខភាពនិងទីផ្សារសំខាន់ៗ ក្រោយពីគណៈនាយកប្រតិបត្តិនៃធនាគារពិភពលោកអនុម័តឥណទានចំនួន ៣៥លានដុល្លារបន្ថែម ។
បើតាមសមាគមអភិវឌ្ឍន៍អន្តរជាតិរបស់ធនាគារពិភពលោក បានឱ្យដឹងថា ការផ្ដល់ឥណទានបន្ថែមនេះ គឺសម្រាប់ គម្រោងកែលម្អការតភ្ជាប់ហេដ្ឋារចនាសម្ព័ន្ធផ្លូវថ្នល់ ក្នុងគោលដោបង្កើនភាពធន់របស់ផ្លូវ សម្រាប់ពលរដ្ឋប្រើប្រាស់ក្នុងការចូលទៅរកទីផ្សារ ទៅសាលារៀន និងទៅរកសេវាសុខាភិបាលនៅខេត្ត ក្រចេះ កំពង់ចាម និងខេត្តត្បូងឃ្មុំ ។ ខេត្តទាំងនេះមានប្រជាជនសរុបជាង២លាននាក់ ដែលក្នុងនោះ ៨០ភាគរយរស់នៅតាមតំបន់ជនបទ ។
គម្រោងផ្លូវទាំអនេះ ផ្ដល់ថវិកាវិនិយោគសម្រាប់បណ្ដាញតភ្ជាប់ផ្លូវនៅតាមខេត្តដែល នៅក្នុងរបាយការណ៍បានចាត់ទុកជាបណ្ដាញផ្លូវប្រឈមខ្លាំងទៅនឹងហានិភ័យប្រែប្រួលអាកាសធាតុ ហើយដែលគ្មានកម្រាលកៅស៊ូឬបេតុង និងសំណង់គ្រប់គ្រងទឹកជំនន់ ត្រឹមត្រូវ ។ ភាពងាយរងគ្រោះនៃបណ្ដាញផ្លូវទាំងនេះ បង្កហានិភ័យដល់លទ្ធភាពក្នុងការទទួលបានសេវាសំខាន់ៗមានដូចជា ការអប់រំ ការថែទាំសុខភាព ជាមួយនឹងផលជះអវិជ្ជមានឥតស្រាកស្រាន្ត ទៅលើការរស់នៅរបស់ពលរដ្ឋក្នុងខេត្តទាំងបី ។
ធនាគារពិភពលោកបានបញ្ជាក់ថា ឥណទានបន្ថែមនេះ នឹងជួយបំពេញការទូទាត់ឱ្យចំណាយគម្រោង ដែលបានឡើងថ្លៃជាងការគ្រោងទុក ជាពិសេសនៅក្នុងកិច្ចសន្យាធ្វើផ្លូវ ។ អតិផរណាខ្ពស់ និងការឡើងថ្លៃលើធាតុចូលសំខាន់ៗដូចជាឥន្ធនៈ និងកៅស៊ូអ៊ុតផ្លូវ ក្នុងអំឡុងពេលបីឆ្នាំមកនេះ បានធ្វើឱ្យថ្លៃចំណាយឡើងថ្លៃហួស ការប៉ាន់ស្មាន នៅក្នុងឆ្នាំ ២០១៩ មុនពេលគម្រោងត្រូវបានអនុម័តជាលើកដំបូង ទៅទៀត ។
លោកស្រីម៉ារីយ៉ាម សាលីម ប្រធានគ្រប់គ្រងនៃធនាគារពិភពលោកប្រចាំកម្ពុជា បានមានប្រសាសន៍ថា លទ្ធភាពចូលទៅរកសេវាថែទាំងសុខភាព និងសាលារៀន ការដឹកជញ្ជូនទំនិញទៅកាន់ផ្សារ សុទ្ធតែជាបញ្ហាប្រឈមធំណាស់ សម្រាប់ពលរដ្ឋកម្ពុជារស់នៅតាមទីជនបទ ជាពិសេស នៅក្នុងរដូវវស្សា ។ មិនតែប៉ុណ្ណោះ ស្ថានភាពផ្លូវអន់ និងការកាត់ផ្ដាច់ដោយទឹកជំនន់ និងចំណាយខ្ពស់លើការដឹកជញ្ជូនបង្កឧបសគ្គធំៗដល់លទ្ធភាពទទួលបានសេវាថែទាំសុខភាព និងការសង្គ្រោះបន្ទាន់ សម្រាប់ស្ត្រីមានផ្ទៃពោះ ។
