ភ្នំពេញ ៖ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដោយមានការគាំទ្រពីធនាគារជាតិនៃកម្ពុជា(NBC) បានរៀបចំសិក្ខាសាលាពិគ្រោះយោបល់ជាមួយភាគីពាក់ព័ន្ធស្តីពី វឌ្ឍនភាព និងទិសដៅអភិវឌ្ឍកម្មវិធីចំណេះដឹងហិរញ្ញវត្ថុ កាលពីថ្ងៃទី២៦ ខែមីនា ឆ្នាំ២០២៤ នៅមណ្ឌលសិក្សាបច្ចេកទេសធនាគារ នៃធនាគារជាតិនៃកម្ពុជា ។
សិក្ខាសាលាពិគ្រោះយោបល់នេះ ទទួលបានការអញ្ជើញចូលរួមជាអធិបតី ពីលោក ហេង បូមករា អគ្គនាយករងត្រួតពិនិត្យទី១ នៃធនាគារជាតិនៃកម្ពុជា លោក Jo Scheuer អ្នកសម្របសម្រួល នៃការិយាល័យអ្នកសម្របសម្រួលអង្គការសហប្រជាជាតិ លោក Makoto Kurokawa សមាជិកក្រុមប្រឹក្សាភិបាល សមាគមធនាគារនៅកម្ពុជា លោកជំទាវ ឌិត នីតា ប្រធានក្រុមប្រឹក្សាភិបាល នៃសមាគមមីក្រូហិរញ្ញវត្ថុកម្ពុជា តំណាងមណ្ឌលសិក្សាបច្ចេកទេសធនាគារ ព្រមទាំង ដៃគូអភិវឌ្ឍន៍ជាតិ និងអន្តរជាតិ សាជីវកម្មហិរញ្ញវត្ថុអន្តរជាតិ មូលនិធិអភិវឌ្ឍន៍មូលធនរបស់អង្គការសហប្រជាជាតិ (UNCDF) អង្គការសង្គមស៊ីវិល និងភាគីពាក់ព័ន្ធទៀតប្រមាណ ៤០នាក់។
បើតាមសេចក្ដីប្រកាសព័ត៌មានរបស់សមាគមធនាគារនៅកម្បុជាឱ្យដឹងថា សិក្ខាសាលាពិគ្រោះយោបល់ជាមួយភាគីពាក់ព័ន្ធនេះធ្វើឡើងក្នុងគោលបំណង ទី១/-ពិភាក្សាអំពីវឌ្ឍនភាពសំខាន់ៗ បញ្ហាប្រឈម ឱកាស ទិសទៅនៃអភិវឌ្ឍបរិយាបន្នហិរញ្ញវត្ថុ និងចំណេះដឹងហិរញ្ញវត្ថុ, ទី២/-ធ្វើសមាហរណកម្មកិច្ចសហការពីគ្រប់ភាគីពាក់ព័ន្ធ ដើម្បីអនុវត្តប្រកបដោយប្រសិទ្ធភាពនូវបរិយាបន្នហិរញ្ញវត្ថុ និងចំណេះដឹងផ្នែកហិរញ្ញវត្ថុ និងទី៣/-ដើម្បីផ្តល់នូវចំណេះដឹង និងជំនាញក្នុងចំណោមភាគីពា់ព័ន្ធសំខាន់ៗលើក្របខណ្ឌនៃការរៀបចំ អនុវត្ត ត្រួតពិនិត្យ និងវាយតម្លៃកម្មវិធីចំណេះដឹងផ្នែកហិរញ្ញវត្ថុប្រកបដោយប្រសិទ្ធភាព។
ក្រោយកិច្ចពិគ្រោះយោបល់ពេញមួយថ្ងៃ អង្គសិក្ខាសាលាសម្រេចបានលទ្ធផលសំខាន់ៗដូចខាងក្រោម៖ ១/-មានអន្តរាគម និងគម្រោងអប់រំហិរញ្ញវត្ថុប្រមាណ ២០គម្រោង ដែលបានកំពុងអនុវត្ត ក្នុងចំណោមជាង ១០ស្ថាប័ន មកពី សង្គមស៊ីវិល សមាគម និងដៃគូអភិវឌ្ឍន៍ និងទី២/-បានកំណត់បានបញ្ហាប្រឈម និងអនុសាសន៍និងទិសដៅ សម្រាប់ពង្រីក និងពង្រឹងកម្មវិធីអប់រំចំណេះដឹងហិរញ្ញវត្ថុនៅកម្ពុជា ៕
