ភ្នំពេញ ៖ កំណើននៃយានយន្តធ្វើចរាចរណ៍ នៅតាមដងផ្លូវក្នុងប្រទេសកម្ពុជាបានកើនឡើងជាបន្តបន្ទាប់ ហើយក្នុងឆ្នាំ២០៣០ កំណើនយានយន្តធ្វើចរាចរណ៍តាមដងផ្លូវក្នុងប្រទេសរំពឹងកើនឡើងដល់៨លានគ្រឿង និងបន្តកើនឡើងដល់១៤លានគ្រឿងក្នុងឆ្នាំ ២០៥០ ។ នេះបើតាមការប៉ាន់ស្មានរបស់រាជរដ្ឋាភិបាលកម្ពុជាកាលពីពេលកន្លងទៅ ។
នៅថ្ងៃទី២៨ មីនា ២០២៤ ធនាគារពិភពលោកក៏បានផ្ដល់ជាទស្សនទានដល់កម្ពុជា ឱ្យត្រៀមខ្លួនក្នុងការងាកទៅប្រើប្រាស់យានយន្តអគ្គិសនីនិងកាត់បន្ថយការប្រើប្រាស់យានយន្តដែលប្រើប្រាស់ប្រេងម៉ាស៊ូត និងសាំង ។
លោកស្រីម៉ារីយ៉ាម សាលីម ប្រធានគ្រប់គ្រងនៃធនាគារពិភពលោកប្រចាំកម្ពុជាបានមានប្រសាសន៍ថា គោលដៅនៃដំណើរឆ្ពោះទៅប្រើយានយន្តអគ្គិសនី គឺអាចសម្រេចបាន ហើយវានឹងជួយកម្ពុជាឈានទៅដល់គោលដៅ អព្យាក្រឹតភាពកាបូនប្រកបដោយមហិច្ឆតារបស់ខ្លួន ។
លោកស្រីបន្តថា ទោះបីជាយ៉ាងណាក៏ដោយ គោលដៅនេះ ទាមទារឱ្យមានការវាយតម្លៃដោយប្រុងប្រយ័ត្នលើការផ្លាស់ប្តូរនេះ ។ ពិតណាស់ បច្ចុប្បន្នប្រជាជនកម្ពុជា ទទួលបានអត្ថប្រយោជន៍ច្រើនតាមរយៈការប្រើប្រាស់យានយន្តជជុះតម្លៃទាប ដែលនាំពីបរទេស ប៉ុន្តែវាបាននាំមកនូវការខាតបង់ធំដល់បរិស្ថាន ហើយក៏នឹងអាចជាឧបសគ្គមួយដល់ការកើនឡើងនូវការប្រើប្រាស់យានយន្តអគ្គិសនីផងដែរ ។លោកស្រីថា« យើងប្ដេជ្ញាជួយរដ្ឋាភិបាលនៅក្នុងអន្តរការនេះ និងស្វែងរកមធ្យោបាយដែលអាចធ្វើទៅបាន នៅក្នុងដំណើរទៅមុខ» ។
ធនាគារពិភពលោកបានផ្ដល់ជាទស្សនទានដល់កម្ពុជា ដើម្បីធានាបានថាយានយន្តអគ្គិសនី មានវត្តមានធ្វើចរាចរណ៍លើដងផ្លូវ ច្រើនជាងយានយន្តប្រើសាំង ឬប្រើប្រេងម៉ាស៊ូត កម្ពុជាចាំបាច់ត្រូវធ្វើកំណែទម្រង់បទប្បញ្ញត្តិនៃការនាំចូល និងប្រើប្រាស់យានយន្ត ដោយប្រើវិធីសាស្ត្ររឹតបន្តឹងបន្តិចម្ដងៗ ។ នៅក្នុងនោះគួរតែអនុវត្តគោលនយោបាយ ដែលតម្រូវលែងឱ្យមានយានយន្តប្រើសាំង ឬម៉ាស៊ូត ធ្វើចរាចរណ៍លើដងផ្លូវតទៅទៀត នៅពេលដែលអាយុកាលរបស់វាចូលដល់រយៈពេលជាក់លាក់ណាមួយ ។វិធីនេះ នឹងបង្កើនតម្រូវការសម្រាប់យានយន្តថ្មី និងជួយបើកផ្លូវឱ្យយានយន្តអគ្គិសនីចូលក្នុងទីផ្សារបានកាន់តែលឿន ។ សម្រាប់រយៈពេលខ្លីខាងមុខ ម៉តូនិងយានកង់បីប្រើអគ្គិសនី ត្រូវបានរំពឹងទុកថានឹងដើរតួនាំមុខគេនៅក្នុងអន្តរកាលឆ្ពោះទៅការប្រើយានយន្តអគ្គិសនី នៅក្នុងប្រទេសកម្ពុជា ។
លោករស់ សីលវ៉ា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានមានប្រសាសន៍ថា ការលើកកម្ពស់យានយន្តអគ្គិសនី ជាឱកាសមួយសម្រាប់កម្ពុជាក្នុងការកាត់បន្ថយបំភាយកាបូនក្នុងការដឹកជញ្ជូនសម្រេចបាននូវមហិច្ឆតានៃការរួមចំណែកតាមការកំណត់របស់ជាតិ និងឈានដល់អព្យាក្រឹតភាពនៃកាបូននៅឆ្នាំ ២០៥០ ។លើសពីនេះទៀត វានឹងជួយកម្ពុជាក្នុងការធ្វើសមាហរណកម្មទៅក្នុងខ្សែចង្វាក់ផ្គត់ផ្គង់ក្នុងតំបន់ និងពិភពលោក ជំរុញការអភិវឌ្ឍឧស្សាហកម្មនិងការបង្កើតការងារទៀតផង ៕
