ភ្នំពេញ ៖ ក្នុងពេលបច្ចុប្បន្ននេះ ការទូទាត់ត្រូវបានមើលឃើញថាធ្វើឡើងតាមប្រព័ន្ធឌីជីថលជាពិសេសការស្កេនឃ្យូអរ ដែលធ្វើឱ្យនិន្នាការនៃការប្រើប្រាស់ប្រព័ន្ធទូទាត់តាមឌីជីថលនៅកម្ពុជាកើនឡើងខ្ពស់ពីមួយឆ្នាំទៅមួយឆ្នាំ ។ នេះបើតាមសេចក្ដីប្រកាសព័ត៌មានរបស់ធនាគារជាតិនៃកម្ពុជាចេញផ្សាយថ្ងៃទី២៩ មីនា ២០២៤ ។
យោងតាមសេចក្ដីប្រកាសព័ត៌មានរបស់ធនាគារជាតិនៃកម្ពុជាបានឱ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ ប្រតិបត្តិការទូទាត់ឌីជីថលនៅកម្ពុជាបានកើនឡើងយ៉ាងឆាប់រហ័ស ដូចជាតាមរយៈការប្រើប្រាស់ប័ណ្ណឥណទាន ប័ណ្ណឥណពន្ធការផ្ទេរប្រាក់ និងជាំពិសេស ការស្កេនឈ្យូអរកូដ សម្រាប់ទូទាត់ ដែលមានចាប់ហាងលក់ទំនិញតូចៗ រហូតដល់ធំ ដោយគ្របដណ្ដប់ស្ទើរគ្រប់ទីកន្លែងនៅទូទាំងប្រទេស ។ ការអភិវឌ្ឍនេះ គឺអាស្រ័យដោយការដាក់ឱ្យប្រើប្រាស់ប្រព័ន្ធទូទាត់ទំនើបៗ ជាបន្តបន្ទាប់ ដែលអនុញ្ញាតឱ្យការទូទាត់ឆ្លងគ្រឹះស្ថាន ការបង្កើន App សម្រាប់ការទូទាត់តាមឃ្យូអរកូដ ការបង្កើតស្តង់ដារឃ្យូអរកូដជាដើម ដែលផ្ដល់ភាពងាយស្រួលដល់ការទូទាត់ឌីជីថល ប្រកបដោយសុវត្ថិភាពនិងឆាប់រហ័ស ជាពិសេសក្នុងពេលដែលការប្រើប្រាស់ទូរសព្ទទំនើបបានកើនឡើងដល់ជាង១៩លានគ្រឿង ច្រើនជាងចំនួនប្រជាជនកម្ពុជាសរុប ដែលមានជាង១៦លាននាក់ ។
សេចក្ដីប្រកាសព័ត៌មានបានបន្ថែមថា ចំនួនប្រតិបត្តិការទូទាត់ឌីជីថលទាំងជាប្រាក់រៀលនិងដុល្លារអាមេរិក បានកើនឡើងពី១១០០លានប្រតិបត្តិការក្នុងឆ្នាំ ២០២២ មកដល់ ១.៧៨៦លានប្រតិបត្តិការ ក្នុងឆ្នាំ ២០២៣ហើយចំនួនទឹកប្រាក់សរុបនៃប្រតិបត្តិការទូទាត់ឌីជីថលទាំងជាប្រាក់រៀល និងដុល្លារអាមេរិក បានកើនឡើងពី៤០០ពាន់លានដុល្លារអាមេរិក ក្នុងឆ្នាំ ២០២២ ដល់ ៤៩២ពាន់លានដុល្លារអាមេរិក ក្នុងឆ្នាំ ២០២៣ ដែលស្មើនឹងប្រមាណ១៦ដងនៃផលិតផលក្នុងស្រុកសរុប ។ ក្នុងចំណោមប្រព័ន្ធទូទាត់ ការប្រើប្រាស់ប្រព័ន្ធបាគង បានកើនឡើងគួរឱ្យកត់សម្គាល់ ដោយមានអតិថិជនបើកគណនីសរុប ២៧,៦លានគណនី ហើយអាចទូទាត់បានជាមួយហាងទំនិញ សេវាកម្មជាង២,៩លានទីតាំងគិតត្រឹមចុងឆ្នាំ ២០២៣ ៕
