ភ្នំពេញ ៖ ដើម្បីជំរុញការអនុវត្តវិធានការគោលនយោបាយផ្ដល់ហិរញ្ញប្បទានដល់ប្រតិបត្តិករទេសចរណ៍ក្នុងខេត្តសៀមរាប ឱ្យបានជោគជ័យ និងឆាប់រហ័ស ធនាគារសហគ្រាសធុនតូច និងមធ្យមកម្ពុជា ( SME Bank ) បានប្រកាសផ្ដល់ឥណទានដល់ម្ចាស់អាជីវកម្ម ប្រតិបត្តិករទេសចរណ៍ក្នុងខេត្តសៀមរាបដែលមានទំហំទឹកប្រាក់ចាប់ពី២ម៉ឺនដុល្លារដល់៦០ម៉ឺនដុល្លារអាមេរិក ។នេះ បើតាមសេចក្ដីជូនដំណឹងរបស់ក្រសួងទេសចរណ៍កម្ពុជានៅថ្ងៃទី១ មេសា ២០២៤ ។
បើតាមសេចក្ដីជូនដំណឹងបានឱ្យដឹងថា ការផ្ដល់ឥណទាននេះ គឺដើម្បីជួយស្ដារនិងលើកស្ទួយស្ថានភាពទេសចរណ៍ក្នុងខេត្តសៀមរាប ដោយផ្ដល់ជូននូវលក្ខខណ្ឌកម្ចីពិសេស ដូចជា៖
ទំហំហិរញ្ញប្បទានមានចាប់ពី២ម៉ឺនដុល្លារដល់៦០ម៉ឺនដុល្លារអាមេរិក ដោយរយៈឥណទាណរហូតដល់៨ឆ្នាំ ជាមួយអត្រាការប្រាក់ប្រមាណ៦.៥ភាគរយក្នុងមួយឆ្នាំ ។ ក្នុងនោះដែរធនាគារក៏បានអនុគ្រោះមិនមានការផាកពិន័យចំពោះការសងត្រលប់មុនកាលកំណត់ ។
អាជីវករឬម្ចាស់អាជីវកម្មក្នុងខេត្តសៀមរាបអាចយករូបិយប័ណ្ណទៅប្រើប្រាស់ជាប្រាក់រៀលឬប្រាក់ដុល្លារទៅតាមការស្នើសុំ ។
សេចក្ដីជូនដំណឹងដដែលឱ្យដឹងថា ក្រសួងទេសចរណ៍សូមលើកទឹកចិត្ត អាជីវកម្មទេសចរណ៍ក្នុងខេត្តសៀមរាបទាំងអស់ ដែលខ្វះខាតទុនវិនិយោគឬទុនបង្វិល សូមទំនាក់ទំនងទៅធនាគារសហគ្រាសធុនតូច និងមធ្យមកម្ពុជា រៀងរាល់ម៉ោងធ្វើការ តាមរយៈលេខទូរសព្ទ 096 236 7789 ឬក្រសួងទេសចរណ៍តាមរយៈលេខទូរសព្ទ 092 779 833 ដើម្បីសាកសួរព័ត៌មានលម្អិតបន្ថែមទាក់ទងនឹងកម្មវិធីខាងលើនេះ ៕
