ភ្នំពេញ គិតត្រឹមដំណាច់ឆ្នាំ ២០២៣កន្លងទៅនេះ ទំហំឥណទានដែលធនាគារបានផ្ដល់ជូនអតិថិជនបានកើនឡើង៥៧,៦ពាន់លានដុល្លារអាមេរិកនិងមានអ្នកកំពុងប្រើប្រាស់ឥណទានជាង៥លានដុល្លារអាមេរិក ។នេះបើតាមរបាយការណ៍របស់ ការិយាល័យឥណទានកម្ពុជា ( CBC ) ។
របាយការណ៍បានបង្ហាញថា ប្រជាពលរដ្ឋក្នុងរាជធានីភ្នំពេញ កណ្ដាល និងសៀមរាប បានប្រើប្រាស់កម្ចីច្រើនជាងគេរហូតដល់៦០ភាគរយនៃទំហំឥណទានសរុបគិតត្រឹមដំណាច់ឆ្នាំ ២០២៣ ក្នុងនោះប្រជាជនចំនួន ៦៧ម៉ឺន៦ពាន់នាក់ ក្នុងរាជធានីភ្នំពេញបានខ្ចីប្រាក់ពីធនាគារឬមីក្រូហិរញ្ញវត្ថុ និងមានទំហំឥណទានសរុបចំនួន ២៨,៥ពាន់លានដុល្លារអាមេរិក ។ សម្រាប់ខេត្តកណ្ដាលមានប្រជាជនចំនួន៣៨ម៉ឺន៤ពាន់នាក់ កំពុងប្រើប្រាស់ឥណទានពី ធនាគារ និងមីក្រូហិរញ្ញវត្ថុ ដែលមានទំហំទឹកប្រាក់ប្រមាណ៣ពាន់លានដុល្លារអាមេរិក ។
ក្នុងរបាយការណ៍ក៏បានបង្ហាញផងដែរពីតំបន់ដែលមានប្រជាជនប្រើប្រាស់កម្ចីតិចជាងគេមានខេត្តកែប ខេត្តប៉ៃលិន និងខេត្តមណ្ឌលគីរី ៕
