ភ្នំពេញ ៖ យោងតាមរបាយការណ៍របស់ក្រុមហ៊ុនក្រេឌីតប្យួរ៉ូ ខេមបូឌា បានឱ្យដឹងថា គិតត្រឹមដំណាច់ឆ្នាំ ២០២៣ ពលរដ្ឋនៅខេត្តព្រះសីហនុប្រមាណ៨ម៉ឺន ៥ពាន់នាក់ កំពុងប្រើប្រាស់ឥណទានពីធានគារ មីក្រូហិរញ្ញវត្ថុ ក្រុមហ៊ុនភតិសន្យានិងគ្រឹះស្ថានឥណទានជនបទ ដែលគិតជាទឹកប្រាក់សរុបជាង១,៣៣ពាន់លានដុល្លារអាមេរិក ។
បើតាមរបាយការណ៍បានឱ្យដឹងថា ស្រុកព្រៃនប់ នៃខេត្តព្រះសីហនុ ជាតំបន់ដែលមានពលរដ្ឋកំពុងប្រើប្រាស់ឥណទានឬខ្ចីលុយពីធនាគារ មីក្រូហិរញ្ញវត្ថុ ច្រើនជាងគេ ដែលមានរហូតដល់ជាង៤ម៉ឺននាក់ បន្ទាប់មកគឺក្រុងព្រះសីហនុ មានជាង៣ម៉ឺន៤ពាន់នាក់ ។ ដោយឡែកក្រុងកោះរ៉ុងជាតំបន់ដែលមានពលរដ្ឋខ្ចីលុយធនាគារឬមីក្រូហិរញ្ញវត្ថុតិចជាងគេ គឺមានត្រឹមតែ២២៦នាក់ប៉ុណ្ណោះ ។
បើគិតជាទំហំទឹកប្រាក់ ពលរដ្ឋក្នុងក្រុងព្រះសីហនុ បាននិងកំពុងខ្ចីប្រាក់ពីគ្រឹះស្ថាន ធនាគារ មីក្រូហិរញ្ញវត្ថុច្រើនជាងគេ សរុបចំនួន ៧២៨លានដុល្លារអាមេរិក ខណៈពលរដ្ឋនៅស្រុកព្រៃនប់ទាំងជាង៤ម៉ឺននាក់នោះ បានខ្ចីលុយសរុបជាង ៥២៩លានដុល្លារអាមេរិក ។
បើតាមរបាយការណ៍របស់ក្រុមហ៊ុនក្រេឌីតប្យួរ៉ូខេមបូឌាបានឱ្យដឹងថា បច្ចុប្បន្ននេះ ប្រជាពលរដ្ឋទូទាំងប្រទេសចំនួនជាង៥លាននាក់ បាននិងកំពុងប្រើប្រាស់ឥណទាន ដែលមានទឹកប្រាក់សរុបជាង៥៧ពាន់លានដុល្លារអាមេរិកពីគ្រឹះស្ថានធនាគារ មីក្រូហិរញ្ញវត្ថុ ក្រុមហ៊ុនភតិសន្យា និងគ្រឹះស្ថានឥណទានជនបទសរុបទាំងអស់១៩៤គ្រឹះស្ថាន ៕
