ភ្នំពេញ ៖ ធនាគារពាណិជ្ជចំនួនពីរនៅកម្ពុជាដែលមានប្រជាប្រិយភាពជាងគេ ទទួលបានប្រាក់ចំណេញខ្ទង់រយលានដុល្លារអាមេរិកក្នុងឆ្នាំ ២០២៣កន្លងមកនេះ ប៉ុន្តែធនាគារមានមានប្រាក់ចំណេញកើនឡើង និងមួយទៀតធ្លាក់ចុះ បើធៀបនឹងឆ្នាំ ២០២២ ។
ធនាគារដែលត្រូវបានប្រជាពលរដ្ឋទូទាំងប្រទេសស្គាល់ច្បាស់ស្ទើរតែគ្រប់គ្នា គឺ ធនាគារអេស៊ីលីដា និងធនាគារអេប៊ីអេ ជាធនាគារដែលមានបណ្ដាញប្រតិបត្តិការគ្របដណ្ដប់ទូទាំងប្រទេសជាពិសេសជាធនាគារដែលបានអភិវឌ្ឍន៍ប្រព័ន្ធទូទាត់តាមបច្ចេកវិទ្យាឌីជីថលច្រើនជាងគេ និងមានអ្នកប្រើប្រាស់ច្រើនជាង ។
ក្នុងឆ្នាំ២០២៣កន្លងទៅធនាគារ ABA ទទួលបានប្រាក់ចំណេញសុទ្ធចំនួន ២៧៦,៤៨លានដុល្លារអាមេរិក បើធៀបឆ្នាំ ២០២២ ប្រាក់ចំនេញរបស់ធនាគារនេះមានកំណើន៥,៤ភាគរយ។ ក្នុងឆ្នាំ ២០២៤ ធនាគារABA បានចូលរួមបង់ពន្ធ ជូនរដ្ឋខ្ទង់ប្រមាណ ៧០លានដុល្លារអាមេរិក ។ នេះ បើតាមរបាយការណ៍របស់ធនាគារវឌ្ឍនៈអាស៊ីចំកាត់ ហៅកាត់ថា ABA ។
ដោយឡែកធនាគារដែលមានប្រជាប្រិយភាពមួយទៀត គឺ ធនាគារអេស៊ីលីដាភីអិលស៊ី ក៏ឃើញថាទទួលបានប្រាក់ចំណេញសុទ្ធប្រមាណ១៣៨លានដុល្លារអាមេរិកដែរ កាលពីឆ្នាំ ២០២៣ ហើយបើធៀបនឹងឆ្នាំ ២០២២កន្លងទៅឃើញថាមានការថយចុះរហូតដល់២០ភាគរយ ។កាលពីឆ្នាំ ២០២២ ធនាគារអេស៊ីលីដាទួលបានប្រាក់ចំណេញសុទ្ធប្រមាណ១៧០លានដុល្លារអាមេរិក ។
ការធ្លាក់ចុះនៃប្រាក់ចំណេញរបស់ធនាគារអេស៊ីលីដា គឺបណ្ដាលពីបញ្ហាសេដ្ឋកិច្ច ក្នុងនោះមានវិបត្តិកូវីដ១៩ សង្គ្រាមរុស្ស៊ី និងអ៊ុយក្រែនជាដើម ៕
