ភ្នំពេញ ៖ កំពង់ចាមចាត់ទុកជាខេត្តមួយ មានប្រជាជនច្រើនជាងគេក្នុងចំណោមបណ្ដាខេត្តនានា ដោយមានប្រជានរហូតដល់ ១លាន២៣ម៉ឺននាក់ ហើយក្នុងចំណោមប្រជាជនក្នុងខេត្តកំពង់ចាមសរុបជាង១លាន២៣ម៉ឺននាក់ មានពលរដ្ឋជាង៣០ម៉ឺននាក់កំពុងប្រើប្រាស់ឥណទាននៅក្នុងវិស័យធនាគារ និងមីក្រូហិរញ្ញវត្ថុ ហើយបើគិតជាទឹកប្រាក់ដែលពលរដ្ឋទាំងជាង៣០ម៉ឹននាក់ជំពាក់នោះមានប្រមាណ ១,៩ពាន់លានដុល្លារអាមេរិក ។ នេះបើតាមរបាយការណ៍ក្រុមហ៊ុនក្រេឌីត ប្យួរ៉ូ ខេមបូឌា ចេញផ្សាយសម្រាប់ឆ្នាំ២០២៣ ។
របាយការណ៍របស់ក្រុមហ៊ុនក្រេឌីតប្យួរ៉ូបានបង្ហាញផងដែរថា នៅក្នុងខេត្តកំពង់ចាមមានគ្រឹះស្ថានផ្ដល់ប្រាក់កម្ចីចំនួន៥២គ្រឹះស្ថាន ក្នុងនោះធនាគារមានចំនួន២៦គ្រឹះស្ថាន មីក្រូហិរញ្ញវត្ថុមានចំនួន២២គ្រឹះស្ថាន និងក្រុមហ៊ុនភតិសន្យា និងគ្រឹះស្ថានឥណទានជនបទមានចំនួន៤គ្រឹះស្ថាន ។
បើតាមរបាយការណ៍ដដែលនេះ ឱ្យដឹងថាក្នុងចំណោមក្រុងស្រុកទាំង១០ក្នុងខេត្តកំពង់ចាម ស្រុកព្រៃឈរ មានចំនួនពលរដ្ឋប្រើប្រាស់ឥណទានច្រើនជាងគេរហូតដល់៤ម៉ឺន៣ពាន់នាក់ ក្នុងនោះអ្នកប្រើប្រាស់ឥណទានជាស្ត្រីមាន៥៥ភាគរយ ។ចំណែកតំបន់ដែលមានពលរដ្ឋប្រើប្រាស់ឥណទានច្រើនបន្ទាប់នោះ គឺស្រុកបាធាយ ដែលមានរហូតដល់ជាង ៣ម៉ឺន៧ពាន់នាក់ ក្នុងនោះស្រីមាន ៥៦ភាគរយ ៕
