ធនាគារ វីង ឈ្នះពានរង្វាន់លើកកម្ពស់ចំណេះដឹងផ្នែកហិរញ្ញវត្ថុ តាមរយៈការជួយសិស្សជាង ៥ពាន់នាក់

តាមការឲ្យដឹងនៅលើទំព័រហ្វែសប៊ុកផ្លូវការរបស់ធនាគារ វីង កាលពីថ្ងៃទី៣១ ចុងខែមករា​ ឆ្នាំ២០២៥ បានបង្ហាញឲ្យដឹងថា សភាពាណិជ្ជកម្មអាមេរិកនៅកម្ពុជា បានធ្វើការរៀបចំកម្មវិធីប្រគល់ពានរង្វាន់ទំនួលខុសត្រូវសង្គមឆ្នើមលើកទី៦ (AMCHAM CAMBODIA 6th CSR EXCELLENCE AWARDS) ជាមួយនឹងការប្រគល់នូវពានរង្វាន់ចំនួន២ ដល់ធនាគារ វីង ផងដែរ។

ក្នុងនោះ ធនាគារ​ វីង ក៏ទទួលបានពានរង្វាន់លើកកម្ពស់ចំណេះដឹងផ្នែកហិរញ្ញវត្ថុ តាមរយៈសកម្មភាពដ៏មមាញឹកក្នុងការចូលរួមកិច្ចការងារសង្គម ជួយជាចំណេះដឹងដល់សិស្សជាង ៥ពាន់នាក់នៅទូទាំងប្រទេសកម្ពុជា ឲ្យទទួលបានចំណេះដឹង ក៏ដូចជាជំនាញចាំបាច់នានា ដើម្បីឲ្យពួកគេអាចគ្រប់គ្រងហិរញ្ញវត្ថុកាន់តែមានប្រសិទ្ធភាព។

ជាមួយគ្នា ធនាគារ វីង ក៏សម្រេចទទួលបានពានរង្វាន់បរិយាប័ន្នឌីជីថល តាមរយៈការទទួលស្គាល់ពីការខិតខំប្រឹងប្រែងជាបន្តបន្ទាប់សំដៅជំរុញការប្រើប្រាស់ប្រព័ន្ធឌីជីថល ដើម្បីបង្កើតគំនិតច្នៃប្រឌិតថ្មីៗ និងភាពជាសហគ្រិនក្នុងវិស័យបច្ចេកវិទ្យា។

សូមជម្រាបថា សព្វថ្ងៃនេះ ធនាគារ វីងបម្រើប្រជាជនកម្ពុជាទាំងមូល ដោយគ្របដណ្តប់១០០% នៃស្រុកនានាក្នុងប្រទេសកម្ពុជា តាមរយៈកម្មវិធីស្មាតហ្វូនវីងប្រកបដោយភាពច្នៃប្រឌិតថ្មីៗ ភ្នាក់ងារវីងដែលមានជិត ១៥.០០០ កន្លែង ដៃគូអាជីវកម្មដែលមានជាង ៥៥.០០០ និងការសហការជាមួយក្រុមហ៊ុនយក្សជាច្រើនក្នុងឧស្សាហកម្មដូចជា៖ Mastercard, MoneyGram, UnionPay, Alipay, WeChat Pay, Western Union, Visa, និង Ria ជាដើម៕