នាឱកាសតំណាងសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២៤ និងលើកទិសដៅបន្ដរបស់ក្រសួងមហាផ្ទៃ និងបូកសរុបលទ្ធផលប្រឡងប្រណាំងចលនា «ភូមិ ឃុំសង្កាត់ មានសុវត្ថិភាព» លោកអភិសន្ដិបណ្ឌិត ស សុខា បានផ្ដាំផ្ញើដល់ប្រជាពលរដ្ឋ ដែលខ្ចីប្រាក់ពីក្រុមកម្ចីអនឡាញខុសច្បាប់ កុំសងប្រាក់ត្រឡប់ទៅក្រុមនោះវិញ ព្រោះក្រុមទាំងនោះជាក្រុម ដែលធ្វើសកម្មភាពខុសច្បាប់ដូចគ្នា។
ក្រោយការលើកឡើងបែបនេះ អគ្គទេសាភិបាលនៃធនាគារជាតិនៃកម្ពុជា លោកជំទាវ ជា សិរី បានលើកឡើងលើទំព័រហ្វែសប៊ុករបស់ខ្លួនថា៖ “សូមរម្លឹកបងប្អូនយើងថា បើមិនចាំបាច់ សុំកុំខ្ចីលុយគេ។ តែបើចំបាច់ត្រូវខ្ចី គួរខ្ចីពីគ្រឹះស្ថានមានអាជ្ញាប័ណ្ណពី ធនាគារជាតិនៃកម្ពុជា ព្រោះនៅពេលមានបញ្ហាយើងអាចរកមុខឃើញ និងដោះស្រាយតាមនីតិវិធីច្បាប់។ មិនដូច អ្នកឲ្យខ្ចីកំបាំងមុខ ពេលឲ្យខ្ចីងាយស្រួល តែមានលក្ខខ័ណ្ឌជាន់ក ប្រើអំពើហឹង្សា ហើយរកមុខមិនឃើញ”។
លោកជំទាវបន្តថា៖ “ទោះយ៉ាងណាសូមបងប្អូន ប្រើប្រាស់លុយកាក់ដោយមានការទទួលខុសត្រូវ និងសូមឲ្យគ្រឹះស្ថានធនាគារ និងហិរញ្ញវត្ថុទាំងអស់ ផ្តល់កម្ចីដោយទទួលខុសត្រូវ ដោយយកចិត្តទុកដាក់លើផលប្រយោជន៍របស់អតិថិជន ព្រោះថាពេល អតិថិជនរុងរឿង គ្រឹះស្ថានក៏រុងរឿងដែរ។ និងសូមអរគុណអាជ្ញាធរមូលដ្ឋានពាក់ព័ន្ធដែលបានផ្តល់ការគាំទ្រកន្លងមក និង តទៅមុខ ក្នុងការចាត់វិធានការចាំបាច់លើអ្នកផ្តល់កម្ចីក្រៅផ្លូវការមិនមានវិជ្ជាជីវៈ ដែលអាចផ្តល់ជាគ្រោះថ្នាក់ដល់ជីវភាពប្រជាជន និង សង្គម”។
បើតាមឯកឧត្តម ស សុខា បានជម្រាបថា កន្លងទៅមានប្រជាពលរដ្ឋធ្លាប់ផុងខ្លួន ទៅខ្ចីលុយអនឡាញខុសច្បាប់ពីក្រុមដែលគ្មានអាជ្ញាប័ណ្ណ ហើយនៅពេលមិនសងប្រាក់ត្រឡប់ទៅវិញក្រុមនោះតែងគំរាមកំហែង បង្ហោះរូបភាពអ្នកខ្ចីនោះជាដើម ខណៈក្រុមកម្ចីអនឡាញខុសច្បាប់នោះ ភាគច្រើនសុទ្ធសឹងតែជាជនជាតិចិន។
ដើម្បីដោះស្រាយរឿងនេះ ឯកឧត្តម ស សុខា បានដាក់ចំៗថា ក្នុងករណីប្រជាពលរដ្ឋរងនូវការគំរាមកំហែងពីក្រុមកម្ចីអនឡាញខុសច្បាប់ លោកលើកទឹកចិត្តឲ្យប្ដឹងមកសមត្ថកិច្ចជំនាញ ដើម្បីស្រាវជ្រាវចាត់វិធានការច្បាប់៕
