ប្រធាននាយកប្រតិបត្តិនៃធនាគារ ស្ថាបនា​ ចូលជួបពិភាក្សាជាមួយអគ្គនាយកនៃនិយ័តករបរធនបាលកិច្ច ដល់ការិយាល័យ

កាលពីថ្ងៃសុក្រ ទី២១ ខែកុម្ភៈ ឆ្នាំ២០២៥ លោក ហែន ហ្គឺ. ម៉ូលដឺ ប្រធាននាយកប្រតិបត្តិនៃធនាគារ ស្ថាបនា បានចូលជួបសំណេះសំណាលពិភាក្សាការងារ និងសំដែងការគួរសមជាមួយឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) នៅការិយាល័យនិយ័តករធនបាលកិច្ច ដើម្បីពិភាក្សាអំពីការអភិវឌ្ឍកាលានុវត្តភាពវិនិយោគ និងលទ្ធភាពដែលអាចចូលរួមក្នុងវិស័យបរធនបាលកិច្ចនៅកម្ពុជា​។

សូមជម្រាបថា ធនាគារ ស្ថាបនា គឺជាធនាគារពាណិជ្ជឈានមុខគេមួយនៅក្នុងព្រះរាជាណាចក្រកម្ពុជា ដែលមានទ្រព្យសកម្មសរុបជាង ២.៨ពាន់លានដុល្លារអាមេរិក និងមានបុគ្គលិកច្រើនជាង ៤ ២០០ នាក់។ ធនាគារមានបណ្តាញសាខាយ៉ាងទូលំទូលាយនៅទូទាំងប្រទេសដែលមានសាខាចំនួន១៧៥ ស្ថាបនាព្រីមារណ៍ចំនួន៣ និងម៉ាស៊ីនអេធីអឹមជាង៣៤០កន្លែង។

ធនាគារ ស្ថាបនា ផ្តល់នូវសេវាធនាគារយ៉ាងពេញលេញដូចជា៖ សេវាឥណទាន សេវាដាក់ប្រាក់បញ្ញើ សេវាធនាគារចល័ត សេវាធនាគារអេឡិចត្រូនិច ប័ណ្ណឥណពន្ធ និងប័ណ្ណឥណទាន សេវាផ្ទេរប្រាក់ក្នុងប្រទេស និងក្រៅប្រទេស សេវាបើកប្រាក់បៀរវត្សន៍ សេវាផ្ទេរប្រាក់ឆ្លងប្រទេសងជាមួយ SWIFT Thunes និងវីសា B2B Connect, សេវា Western Union សេវាហិរញ្ញប្បទានពាណិជ្ជកម្ម និងសេវាហិរញ្ញវត្ថុផ្សេងៗទៀត៕