នាថ្ងៃទី៤ ខែមីនា ឆ្នាំ២០២៥ ឯកឧត្តម យឹម លាត ទេសាភិបាលរង ធនាគារជាតិនៃកម្ពុជា បានអញ្ជើញជាអធិបតី ក្នុងពិធីចុះហត្ថលេខាលើអនុស្សារណៈយោគយល់រវាងធនាគារជាតិនៃកម្ពុជា និងសាជីវកម្មគ្រប់គ្រងទ្រព្យសកម្មកូរ៉េ (KAMCO) ជាមួយលោក Nam Ju Kwon ប្រធាន និងជានាយកប្រតិបត្តិ KAMCO ព្រមទាំងមានការអញ្ជើញចូលរួមផងដែរពីថ្នាក់ដឹកនាំជាន់ខ្ពស់របស់ធនាគារជាតិនៃកម្ពុជា ថា្នក់ដឹកនាំ KAMCO គណៈកម្មការសេវាហិរញ្ញវត្ថុកូរ៉េ (FSC) និងសាជីវកម្មធានាប្រាក់បញ្ញើកូរ៉េ (KDIC) សរុបប្រមាណ ៥០រូប។
អនុស្សរណៈយោគយល់នេះមានគោលបំណងជំរុញកិច្ចសហប្រតិបត្តិការ និងកិច្ចសម្របសម្រួលរវាងស្ថាប័នទាំងពីរ តាមរយៈការផ្លាស់ប្តូរបទពិសោធន៍អនុវត្តន៍ជាក់ស្តែង និងចំណេះដឹងទាក់ទងនឹងការគ្រប់គ្រងបញ្ហាឥណទានមិនដំណើរការ។ ឯកសារនេះក៏គ្របដណ្តប់រាល់ចំណុចសំខាន់ៗ ដូចជា យន្តការនៃកិច្ចសហប្រតិបត្តិការតាមរយៈការផ្តល់ព័ត៌មានផ្នែកសេដ្ឋកិច្ច ក្របខ័ណ្ឌច្បាប់ដែលបានប្រកាសជាសាធារណៈ ការផ្លាស់ប្តូរឯកសារស្រាវជ្រាវនិងការពង្រឹងសមត្ថភាពមន្ត្រី-បុគ្គលិក និងចែករំលែកបទពិសោធន៍ ជាដើម។
ឯកឧត្តម ទេសាភិបាលរង បានមានប្រសាសន៍ពីសារៈសំខាន់នៃកិច្ចសហប្រតិបត្តិការល្អរវាងស្ថាប័នទាំងពីរ ក្នុងគោលដៅលើកកម្ពស់ស្ថិរភាពហិរញ្ញវត្ថុ និងពង្រឹងសំណាញ់សុវត្ថិភាពហិរញ្ញវត្ថុនៅក្នុងប្រទេសកម្ពុជា និងកូរ៉េឱ្យកាន់តែរឹងមាំថែមទៀត។ ភាគី KAMCO ក៏បានបង្ហាញឆន្ទៈក្នុងការពង្រឹងកិច្ចសហប្រតិបត្តិនេះឱ្យកាន់តែល្អប្រសើរ សំដៅលើកកម្ពស់ផលប្រយោជន៍រួម៕
