នារសៀលថ្ងៃទី៥ ខែមីនា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារ ARDB ឯកឧត្តម បាន លឹម អគ្គនាយករង នៃធនាគារ ARDB និងសហការី បានជួបពិភាក្សាការងារជាមួយក្រុមការងារនៃក្រសួងបរិស្ថានដែលដឹកនាំដោយលោកជំទាវ មាស ច័ន្ទធីតា អនុរដ្ឋលេខាធិការនៃក្រសួងបរិស្ថាន។
កិច្ចប្រជុំនេះមានគោលបំណងពិភាក្សាចែករំលែកព័ត៌មានផ្សេងៗរវាងស្ថាប័នទាំងពីរ សម្រាប់ជាមូលដ្ឋានក្នុងការរៀបចំផែនការសកម្មភាពរួមគ្នាក្រោមក្របខ័ណ្ឌនៃអនុស្សារណ:យោគយល់គ្នា។
សូមជម្រាបថា ធនាគារ ARDB (បច្ចុប្បន្នត្រូវបានស្គាល់ថា ជាធនាគារអភិវឌ្ឍន៍ជន និងកសិកម្ម) ជាអង្គភាពរបស់រដ្ឋទាំងស្រុងមួយ ដែលបង្កើតឡើងតាមអនុក្រឹត ចុះថ្ងៃទី២១ ខែមករា ឆ្នាំ១៩៩៨ ក្នុងគោលបំណងជំរុញសកម្មភាពកសិកម្ម និងសេដ្ឋកិច្ចជនបទដើម្បីកាត់បន្ថយភាពក្រីក្រ និងលើកតម្កើននូវកម្រិតជីវភាពរបស់ប្រជាជនតាមជនបទ៕
