លោកជំទាវបណ្ឌិត ជា សិរី ទេសាភិបាលធនាគារជាតិ អនុញ្ញាតឲ្យគណៈប្រតិភូក្រុមប្រឹក្សាធុរកិច្ចអាស៊ាននៃប្រទេសម៉ាឡេស៊ី ជួបសម្តែងការគួរសម

នារសៀលថ្ងៃទី៦ ខែមីនា ឆ្នាំ២០២៥ នៅទីស្នាក់ការធនាគារជាតិនៃកម្ពុជា អាគារវត្តភ្នំ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យគណៈប្រតិភូក្រុមប្រឹក្សាធុរកិច្ចអាស៊ាន នៃប្រទេសម៉ាឡេស៊ី (ASEAN-BAC Malaysia) ដឹកនាំដោយលោក Tan Sri Nazir Razak ប្រធាន ASEAN-BAC Malaysia ចូលជួបសម្តែងការគួរសម និងពិភាក្សាការងារ

នៅក្នុងជំនួបនេះ លោក Tan Sri Nazir Razak បានជម្រាបជូនលោកជំទាវអំពីគំនិតផ្តួចផ្តើម និងផែនការការងារមួយចំនួនរបស់ ក្រុមប្រឹក្សាធុរកិច្ចអាស៊ាន នៃប្រទេសម៉ាឡេស៊ី ក្នុងពេលដែលប្រទេសម៉ាឡេស៊ីធ្វើជាប្រធានអាស៊ាន ឆ្នាំ២០២៥។ លោកបានស្នើកិច្ចសហការនិងគាំទ្រលើគំនិតផ្តួចផ្តើមទាំងនេះ ដោយបញ្ជាក់ថានឹងផ្តល់ជាប្រយោជន៍ដល់បណ្តាប្រទេសជាសមាជិកអាស៊ាន។

លោកជំទាវទេសាភិបាល បានបង្ហាញការស្វាគមន៍ និងសង្កត់ធ្ងន់ពីសារៈសំខាន់នៃគំនិតផ្តួចផ្តើមដែលផ្តល់ជាយន្តការ ឈ្នះ-ឈ្នះ សម្រាប់គ្រប់ភាគី។ បន្ថែមលើនេះ លោកជំទាវក៏បានលើកឡើងពីកិច្ចសហការល្អរវាងធនាគារជាតិនៃកម្ពុជា និងបណ្តាធនាគារកណ្តាលជាច្រើននាពេលកន្លងមក ព្រមទាំងរំលេចពីវឌ្ឍនភាពសេដ្ឋកិច្ចរបស់កម្ពុជា ក៏ដូចជាសក្តានុពលនៃវិស័យហិរញ្ញវត្ថុកម្ពុជា។

បន្ទាប់ពីជំនួបនេះ គណៈប្រតិភូក្រុមប្រឹក្សាធុរកិច្ចអាស៊ាន នៃប្រទេសម៉ាឡេស៊ី ក៏បានធ្វើទស្សនកិច្ច សារមន្ទីរ ព្រះស្រីឦសានវរ្ម័ន Preah Srey Içanavarman Museum – Sosoro ដែលជាសារមន្ទីរទំនើបបង្ហាញអំពីប្រវត្តិសាស្រ្តដ៏គួរឱ្យចាប់អារម្មណ៍របស់ប្រទេសកម្ពុជារយៈពេលជាង ២០០០ឆ្នាំ ជាពិសេសអំពីទិដ្ឋភាពសេដ្ឋកិច្ច និងរូបិយវត្ថុ ផងដែរ៕