ក្រៅពីការខ្ចីឥណទានពីធនាគារស្របច្បាប់ត្រឹមត្រូវ បច្ចុប្បន្នក៏មានការផ្តល់ឥណទានតាមរយៈបណ្តាញសង្គម ឬតាមអ៊ិនធឺណេត ដែលមួយរយៈចុងក្រោយនេះមានបញ្ហាជាច្រើនបានកើតឡើងចំពោះប្រជាពលរដ្ឋខ្មែរ។ ក្នុងនោះ ធនាគារកម្ពុជាសាធារណៈ ក៏បានចែករំលែកសាច់រឿងដ៏ល្អមួយពាក់ព័ន្ធនឹងកម្ចីតាមបណ្តាញសង្គមនេះ ដូចខាងក្រោម៖
តុលាបានប្រទះឃើញការផ្សព្វផ្សាយពាណិជ្ជកម្ម អំពីការផ្តល់ប្រាក់កម្ចីលើបណ្តាញសង្គម ដែលផ្តល់ការអនុម័តរហ័ស ជាមួយនឹងការបង់រំលស់ប្រចាំខែតិច។ គាត់ចាប់អារម្មណ៍ស្នើសុំប្រាក់កម្ចីនោះ ប៉ុន្តែតម្រូវឲ្យគាត់ទូទាត់កម្រៃផ្សេងៗជាមុន ជាថ្នូរនឹងការកែលម្អពិន្ទុប្រាក់កម្ចីរបស់គាត់។ តបតាមតម្រូវការ តុលាបានទូទាត់ប្រាក់កម្ចីជាមុន ហើយបានបង្ហាញព័ត៌មានគណនីរបស់ខ្លួន ដើម្បីឲ្យប្រាក់កម្ចីរបស់គាត់ទទួលបានការអនុម័ត។
ក្រោយមក អ្នកផ្តល់ប្រាក់កម្ចីបានចេញមូលប្បទានបត្រដែលមិនទាន់មានសុពលភាពដែលមានចំនួនទឹកប្រាក់ ហើយបានស្នើឲ្យតុលា បង់ប្រាក់បន្ថែម។ បន្ទាប់ពីបានទូទាត់រួចហើយ តុលាបានទាក់ទងទៅអ្នកផ្តល់ប្រាក់កម្ចី ប៉ុន្តែទាក់ទងមិនចូល។ ក្រោយមកទើបគាត់ដឹងថា គាត់បានចាញ់បោកគេហើយ។ ជាលទ្ធផល គាត់បានបាត់បង់ប្រាក់យ៉ាងច្រើន។
ចូរចងចាំថា គួរស្នើសុំប្រាក់កម្ចីពីគ្រឹះស្ថានធនាគារ និងហិរញ្ញវត្ថុដែលមានអជ្ញាប័ណ្ណត្រឹមត្រូវប៉ុណ្ណោះ។ ម្យ៉ាងវិញទៀត ជៀសវាងស្នើសុំប្រាក់កម្ចីតាមរយៈថ្នាលបណ្តាញសង្គម និងប្រភពមិនច្បាស់លាស់ ជាពិសេសគឺជៀសវាងការផ្ទេរប្រាក់ ក្នុងករណីជនឆបោកស្នើសុំការទូទាត់ ឬកម្រៃជាមុន៕
