ធនាគារកម្ពុជាសាធារណៈ បានលើកឡើងអំពីរឿងមួយទាក់ទងនឹងការឆបោកលើការវិនិយោគ ដើម្បីជាសារដាស់តឿន មុនពេលសម្រេចចិត្តក្នុងការវិនិយោគលើអ្វីមួយ ត្រូវសិក្សាឲ្យបានច្បាស់លាស់ មិនត្រូវសម្រេចចិត្តដូចរឿងខាងក្រោមនេះទេ៖
សម្បត្តិ ដែលជានិវត្តន៍ជនកំពុងស្វែងរកគម្រោងវិនិយោគ ដើម្បីវិនិយោគប្រាក់សោធននិវត្តន៍របស់គាត់។ ថ្ងៃមួយ គាត់បានឃើញការផ្សព្វផ្សាយពាណិជ្ជកម្មមួយលើបណ្តាញសង្គម ដែលផ្តល់គម្រោងវិនិយោគ ជាមួយប្រាក់ចំណេញខ្ពស់ និងមានហានិភ័យទាប។ សម្បត្តិ មានអារម្មណ៍រំភើបហើយបានសម្រេចចិត្តវិនិយោគទឹកប្រាក់ទៅលើគម្រោងនោះ ដោយមិនបានស៊ើបសួរឲ្យបានច្បាស់លាស់។
សម្បត្តិ បានទទួលការណែនាំឲ្យទូទាត់ប្រាក់ជាមុន ហើយដោយសារភ្នាក់ងារវិនិយោគនោះ ទំនងជាភ្នាក់ងារស្របច្បាប់ សម្បត្តិ បានធ្វើប្រតិបត្តិការទូទាត់ទៅលើលេខគណនីដែលភ្នាក់ងារនោះបានផ្តល់ឲ្យ។ ពីរបីថ្ងៃក្រោយមក សម្បត្តិ បានព្យាយាមទំនាក់ទំនងទៅភ្នាក់ងារនោះ ទើបបានដឹងថា គាត់ត្រូវបានគេបិទទំនាក់ទំនងហើយ។ ក្រោយមកដោយមានការសង្ស័យ សម្បត្តិ បានស្រាវជ្រាវអំពីគម្រោង ហើយបានដឹងថា វាជាគម្រោងក្លែងក្លាយ ខណៈទឹកប្រាក់របស់គាត់ត្រូវបានជនឆបោកយកទៅបាត់។
ចុះតើត្រូវធ្វើយ៉ាងដូចម្តេច ដើម្បីប្រុងប្រយ័ត្នឲ្យមានប្រសិទ្ធិភាព?
១. មិនត្រូវជឿទុកចិត្តលើគម្រោងណា ដែលសន្យាផ្តល់ប្រាក់ចំណេញខ្ពស់ ហើយមានហានិភ័យទាបទេ
២. ធ្វើការស្រាវជ្រាវព័ត៌មានអំពីក្រុមហ៊ុន ឬភ្នាក់ងារដែលផ្តល់គម្រោងវិនិយោគនោះ
៣. មិនត្រូវធ្វើការផ្ទេរប្រាក់ដោយមិនមានព័ត៌មានច្បាស់លាស់ ក្នុងករណីភ្នាក់ងារស្នើសុំឲ្យទូទាត់ប្រាក់ ឬបង់កម្រៃជាមុន៕
