ដោយត្រូវបានបង្កើតឡើងក្នុងឆ្នាំ 1996 មានឈ្មោះថាធនាគារ វឌ្ឍនៈអាស៊ី ចំកាត់ បច្ចុប្បន្នកំពុងស្ថិតក្នុងចំណោមធនាគារពាណិជ្ជធំបំផុតនៅកម្ពុជា ដោយបាននិងកំពុងដើរតួនាទីយ៉ាងសំខាន់ក្នុងការរួមចំណែកអភិវឌ្ឍសេដ្ឋកិច្ចជាតិ តាមរយៈតួលេខគួរឲ្យចាប់អារម្មណ័លើរបាយការណ៍ហិរញ្ញវត្ថុរបស់ខ្លួន។
បើតាមការបង្ហោះលើទំព័រហ្វែសប៊ុកផ្លូវការរបស់ធនាគារ ABA បានឲ្យដឹងថា ចាប់តាំងពីឆ្នាំ២០០៩ រហូតមកដល់ពេលបច្ចុប្បន្ននេះ ធនាគារ ABA បានបង់ពន្ធជូនរដ្ឋប្រមាណ ៥០០លានដុល្លារ រហូតធ្វើឲ្យខ្លួនឈានទៅទទួលវិញ្ញាបនបត្រអនុលោមភាពសារពើពន្ធ “ប្រភេទមាស” ពីអគ្គនាយកដ្ឋានពន្ធដារជាបន្តបន្ទាប់ រយៈពេលប្រាំបីឆ្នាំជាប់ៗគ្នា។
ជាមួយគ្នា ធនាគារបានបញ្ចេញកម្ចីរហូតដល់ទៅ ៨.៦ពាន់លានដុល្លារ ជំរុញដល់សេដ្ឋកិច្ចកម្ពុជា និងបានផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធនានាក្នុងវិស័យអាកាសចរណ៍ ថាមពលបៃតង កសិកម្ម និងវិស័យសំខាន់ៗជាច្រើនទៀត ក្នុងនោះធនាគារបានជួយជម្រួលដល់កិច្ចការប្រមូលពន្ធជូនរដ្ឋគួរឲ្យកត់សម្គាល់ផងដែរ តួយ៉ាង២៥% សម្រាប់ពន្ធដារគ្រប់ប្រភេទ និង១០% សម្រាប់ពន្ធគយ និងកាតព្វកិច្ចផ្សេងៗ។
សូមជម្រាបថា ធនាគារ ABA គឺជាបុត្រសម្ពន្ធរបស់ ធនាគារជាតិកាណាដា ដែលជាគ្រឹះស្ថានហិរញ្ញវត្ថុមួយ មានទ្រព្យសកម្មជាង ៣២១ប៊ីលានដុល្លារអាមេរិក គិតត្រឹមថ្ងៃទី៣០ ខែមេសា ឆ្នាំ២០២៤ និងមានបណ្តាញធនាគារឆ្លើយឆ្លងដ៏ធំនៅទូទាំងពិភពលោក។ ទន្ទឹមនឹងនោះ ឆ្លងកាត់រយៈពេល ២៧ឆ្នាំ ក្នុងវិស័យធនាគារនៅកម្ពុជា ABA បានពង្រឹងជំហររបស់ខ្លួនយ៉ាងរឹងមាំក្នុងទីផ្សារ ដើម្បីបម្រើសេវាជូនដល់បណ្ដាអតិថិជនជាច្រើនដូចជា សហគ្រាសធុនតូច និងមធ្យម, អាជីវកម្មខ្នាតតូច និងរូបវន្តបុគ្គល ជាមួយបណ្ដាញសាខាចំនួន 99កន្លែង ម៉ាស៊ីនស្វ័យសេវាលើស ១ ៧០០កន្លែងនៅទូទាំងប្រទេស សេវាធនាគារអនឡាញ និងកម្មវិធីធនាគារតាមទូរស័ព្ទដ៏ទំនើប បានធ្វើឲ្យធនាគារ ABA អាចបម្រើអតិថិជនបានកាន់តែច្រើនឡើងៗ ជាមួយសេវាហិរញ្ញវត្ថុដ៏ទំនើបសម្បូរបែបនេះ គ្រប់ពេលវេលា និងគ្រប់ទីកន្លែង៕
