កាលពីថ្ងៃទី៣១ ខែមីនា ឆ្នាំ២០២៥ ធនាគារ ស៊ីអាយអិមប៊ី ភីអិលស៊ី (CIMB Bank) និងក្រុមហ៊ុន Smart Axiata (Smart) បានសម្រេចចុះហត្ថលេខាលើអនុស្សរណៈនៃការយោគយល់គ្នា (MoU) ស្ដីពីកិច្ចព្រមព្រៀងហិរញ្ញប្បទានចំនួន ៥០លានដុល្លារអាមេរិកជាទុនវិនិយោគ ដើម្បីពង្រឹងហេដ្ឋារចនាសម្ព័ន្ធបណ្តាញ និងការត្រៀមខ្លួនសម្រាប់បច្ចេកវិទ្យា 5G ។
កិច្ចព្រមព្រៀងនៃហិរញ្ញប្បទានចំនួន ៥០លានដុល្លារអាមេរិកនេះ ជាកាតាលីករដ៏សំខាន់ក្នុងការជួយគាំទ្រក្រុមហ៊ុន Smart ពង្រីកវិសាលភាពនៃហេដ្ឋារចនាសម្ព័ន្ធបណ្ដាញសេវាអ៊ីនធឺណិតឱ្យបានកាន់តែប្រសើរថែមមួយកម្រិតទៀត ស្របពេលដែល Smart ត្រៀមខ្លួនសម្រាប់ប្រព័ន្ធ 5G ក្នុងពេលអនាគត។
ក្នុងនាមជាដៃគូហិរញ្ញវត្ថុដែលទទួលបានការទុកចិត្តខ្ពស់នៅប្រទេសកម្ពុជាជាង ១៥ឆ្នាំមកនេះ ធនាគារ ស៊ីអាយអិមប៊ី ប្តេជ្ញាចិត្តក្នុងការផ្តល់លទ្ធភាពដល់បណ្ដាអាជីវកម្មនានា ឬអតិថិជនបុគ្គលនូវធនធានហិរញ្ញវត្ថុដែលពួកគេត្រូវការ។ ភាពជាដៃគូនេះក៏ជួយពង្រឹងដល់ការតភ្ជាប់រវាងធនាគារ ស៊ីអាយអិមប៊ី ភីអិលស៊ី ជាមួយសហគ្រាស ព្រមទាំងធានាបាននូវសេវាធនាគារឌីជីថលដែលរឹងមាំ ដោយរួមគ្នាពន្លឿនវឌ្ឍនភាពផ្នែកបច្ចេកវិទ្យា បរិយាបន្នហិរញ្ញវត្ថុ និងកំណើនប្រកបដោយនិរន្តរភាពនៅក្នុងប្រទេសកម្ពុជា៕
