ក្នុងចំណោមរដ្ឋមន្ត្រីថ្មីទាំង ២៨រូប កត់សំគាល់ឃើញមានតិចរូបណាស់ជាស្ត្រី ក្នុងនោះក៏មានវត្តមានមេដឹកនាំវ័យក្មេង លោកជំទាវ ចម និម្មល ដែលជាមេដឹកនាំមួយរូប កំពុងកាន់តំណែងកំពូលក្នុងជួររដ្ឋាភិបាល ក្នុងនាមជារដ្ឋមន្ត្រីក្រសួងពាណិជ្ជកម្ម។
តាមរយៈប្រភពខ្លះថាលោកស្រី កើតនៅថ្ងៃទី១៧ ខែសីហា ឆ្នាំ១៩៧៦ ឯខ្លះទៀតថាលោកស្រីកើតនៅថ្ងៃទី១៨ ខែឧសភា ឆ្នាំ១៩៨០ ក្រោមវង្សត្រកូលឥស្សរជន ដែលមានឳពុកជាអតីតរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ពោលគឺឯកឧត្តមកិត្តិសេដ្ឋាបណ្ឌិត ចម ប្រសិទ្ធ និងមានម្តាយជា លោកជំទាវឧកញ៉ា ទេព បុប្ផាប្រសិទ្ធ។ លោកជំទាវ ចម និម្មល ក៏មាននូវបងប្អូនបង្កើតចំនួន ៣នាក់ នោះគឺឯកឧត្តម ចម បូរិទ្ធ ជាអនុរដ្ឋលេខាធិការក្រសួងឧស្សាហកម្ម និងលោកស្រី ចម ក្រស្នា ដែលជាអគ្គនាយិកាក្រុមហ៊ុន សោម៉ា ត្រេឌីង ខូអិលធីឌី រួមជាមួយបងប្អូនចិញ្ចឹមម្នាក់ទៀតលោកស្រី ចម សុធារ៉ា ។
ងាកមកមើលជីវិតពេលកុមារភាព កុមារី ចម និម្មល ស្ថិតក្នុងវ័យសិក្សាក្រេបចំណេះដឹង ដោយធ្លាប់រៀនសូត្រនៅសាលាបឋមសិក្សា ចតុមុខ ក្រោយមកបានផ្លាស់ទៅបន្តការសិក្សានៅបរទេស ជាមួយចំណេះជំនាញមានគំនិតជ្រៅជ្រះ ក្រោយបានបញ្ចប់ការសិក្សាមុខជំនាញសេដ្ឋកិច្ចអន្តរជាតិ និងវិទ្យាសាស្ត្រ ក្នុងទឹកដីសហរដ្ឋអាមេរិក រួចបានស្រូតត្រឡប់មកកាន់មាតុភូមិវិញ។
មុនពេលប្រកាសតែងតែងលោកជំទាវ ចម និម្មល ជារដ្ឋមន្ត្រីក្រសួងពាណិជ្ជកម្ម កាលពីឆ្នាំ២០២៣ ពីប្រមុខដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី លោកស្រីកាលនោះមានតួនាទីជារដ្ឋលេខាធិការនៃក្រសួងពាណិជ្ជកម្ម ព្រមទាំងមានភារកិច្ចទទួលបន្ទុកវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ។ មិនតែប៉ុណ្ណោះ លោកស្រីក៏មានតួនាទីជាសមាជិកគណៈអចិន្ត្រៃយ៍គណៈកម្មាធិការកណ្តាលសហព័ន្ធយុវជនកម្ពុជា
មុនពេលដែលត្រូវបានរាជរដ្ឋាភិបាលប្រកាសតែងតាំងតំណែងជារដ្ឋមន្ត្រីនៃក្រសួងពាណិជ្ជកម្ម ក្នុងនិតិកាលទី៧ ឆ្នាំ២០២៣ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែតនេះ លោកជំទាវ ចម និម្មល ជារដ្ឋលេខាធិកានៃក្រសួងពាណិជ្ជកម្មជិត២០ឆ្នាំមកហើយជាមួយការដឹកនាំដ៏ល្អក្នុងនាមជានារីវ័យក្មេងមួយរូបក្នុងជួររាជរដ្ឋាភិបាល ព្រមទាំងទទួលបន្ទុកវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ ក្រៅពីការងារស្នូលនេះ លោកជំទាវក៏ត្រូវបានគេដឹងថាមានតួនាទីជាសមាជិកគណៈអចិន្ត្រៃយ៍គណៈកម្មាធិការកណ្ដាលសហភាពសហព័ន្ធយុវជនកម្ពុជា ហើយក៏ជាបេក្ខជនពេញសិទ្ធលេខរៀងទី៥ នៃបញ្ជីបេក្ខជនតំណាងរាស្ត្រនៃគណបក្សប្រជាជនកម្ពុជា មណ្ឌលកំពត។
សូមជម្រាបបន្ថែមថា លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានរៀបការក្នុងឆ្នាំ២០០២ ដោយមានចំណងដៃកូនស្រី ៣នាក់ជាមួយស្វាមីជាអគ្គនាយករងនៃអគ្គនាយកដ្ឋាននយោបាយ និងកិច្ចការបរទេស និងក៏ជានាយកនៃនាយកដ្ឋានទំនាក់ទំនងអន្តរជាតិ នៃក្រសួងការពារជាតិ ឧត្តមសេនីយ៍ឯក ផាត វិបុលសុភ័ក្ត្រ ដែលត្រូវបានគេស្គាល់ថាជាកូនប្រុសបង្កើតរបស់ឯកឧត្តមនាយឧត្តមសេនីយ៍ នាង ផាត រដ្ឋលេខាធិកាប្រចាំការនៃក្រសួងការពារជាតិ៕
