ទោះបីជាអ្នកកំពុងធ្វើការឲ្យគេមានប្រាក់ខែតិច ឬច្រើនយ៉ាងណា ហើយម្យ៉ាងទោះបីជាអ្នករកស៊ីដោយឯករាជ្យក៏ដោយ ជឿជាក់ថាពេលខ្លះអ្នកមិនអាចគ្រប់គ្រងចំណូលចំណាយរបស់អ្នកឲ្យមានតុល្យភាពបានល្អ១០០% ដោយខែខ្លះការចំណាយខ្វះមុខខ្វះក្រោយ មិនគ្រប់ជ្រុងជ្រោយ។ នេះអាចមកពីការបែងចែកប្រាក់ចំណូល យកមកចាយវាយមិនទាន់ត្រូវទិសដៅ ដូច្នេះហើយបានជាអ្នកជំនាញ លើកចិត្តឲ្យយើងគួរដើរតាមក្បួនមួយនេះ ធានាដឹងតែសល់លុយចុងខែ មានលទ្ធភាពទិញអ្វីដែលខ្លួនប៉ងប្រាថ្នា នាពេលអនាគត។
ក្បួន 50/30/20 ជាក្បួនដ៏ពេញនិយម ដែលមនុស្សភាគច្រើនប្រើប្រាស់វាបានយ៉ាងជោគជ័យ។ ក្បួននេះត្រូវបានគេគណនាប្រាក់ចំណូលប្រចាំខែរបស់អ្នកបន្ទាប់ពីដកពន្ធហើយ។ ប្រាក់ចំណូល១០០% របស់អ្នក ត្រូវដក៥០% សម្រាប់តម្រូវការចាំបាច់ តួយ៉ាងថ្លៃជួលផ្ទះ ថ្លៃអាហារប្រចាំថ្ងៃ បង់វិក័យបត្រទឹកភ្លើង អ៊ីនធឺណេត និងថ្លៃប្រេងឥន្ធនៈជាដើម។
ដោយឡែក សម្រាប់៣០% គឺចង់សំដៅទៅលើចំណង់ចំណូលចិត្ត ឧទាហរណ៍ដូចជា ការទទួលទានអាហារនៅខាងក្រៅ ការដើរទិញអីវ៉ាន់ និងដំណើរកម្សាន្តយូរៗម្តងជាដើម។ ទន្ទឹមនឹងនោះ ២០%ឯទៀត គឺសម្រាប់សន្សំទុក ព្រោះដើម្បីបង្ការពេលមានអាសន្នអន់ក្រ ក៏ដូចជាត្រៀមប្រាក់ដើម្បីយកទៅវិនិយោគបង្កើនចំណូលបន្ថែម ឬសម្រាប់ពេលដែលខ្លួនចាស់ទៅ ម្យ៉ាងក៏អាចយកប្រាក់សន្សំនោះ ទៅទិញរបស់របរដែលខ្លួនប៉ងជាក្តីសុខរបស់ខ្លួនក៏ថាបានដែរ។
ក្បួន 50/30/20 នេះត្រូវបានគេប្រើប្រាស់ជោគជ័យច្រើនរួចមកហើយ ប៉ុន្តែវាក៏មិនអាចសាកសមសម្រាប់មនុស្សគ្រប់គ្នាឡើយ ដោយអ្នកខ្លះដែលមិនមានចំណូលទៀតទាត់ ឬទាបពេក ពិតជាពិបាកក្នុងការប្រើប្រាស់ក្បួននេះ។ យ៉ាងណា បើសិនជាអាចប្រើប្រាស់ក្បួននេះបានមែននោះ នោះវានឹងនាំឲ្យចំណូលរបស់អ្នកមានលំនឹង ជួយសម្រេចនៃការសន្សំប្រាក់សម្រាប់ថ្ងៃអនាគត ក៏ដូចជាជៀសវាងការចាយហួសកម្រិត មិនដឹងខ្ទង់ និងមិនងាយនឹងចាយវាយមិនគ្រប់ដល់ចុងខែផងដែរ៕
